Noosa Heads

26.12.09 - 28.12.09

Hervey Bay - Noosa: a dem morge isch gar nüd gsi mit usschlafe und mier sind am morge am halbi 5i scho ufgstande. naürlich hed das alles au sin grund gha. mier hend nämlich so um die halbi 8i welle in tin can bay sie, will det jede morge am 8i delphin as ufer chömed und mer die cha füettere. und au hüt sinds cho und mier hend für 5 dollar chönne es fischli chaufe und dem delphin vor d nase hebe. und wo am 9i de ganzi spuk scho verbie gsi isch, sind mier au wiiter zoge. de nächsti halt isch in rainbow beach gsi und det sind mier ad beach go bade. ussert em strand hed rainbow beach ned vill z biete, defür isch de super und vorallem wellig... es isch eigentlich meh en surfer strand und dementsprechend heds au vill surfer gha. nachdem mier au vo rainbow beach gnueg gseh gha hend, sind mier wiiter richtig noosa heads gfahre.

Noosa: oder au d stadt mit de 1000 chreisel, aber nomeh s nizza vo australie. mier sind nur ganz churz is stadt zentrum inegfahre und det heds au am abig no gwimmlet vo lüüt, wo i all dene läde oder bistros am umeschlemmere gsi sind. mier sind de aber gli mal uf d suechi nach me platz für d nacht und sind nach langem sueche (s navi hed üs chle im gugus umegjagt) fündig worde. am abig sind mier no schnell is internet und hend no en rundi billard gspielt und de is bett.

de plan für de nächsti tag isch eigentlich gsi chle go shoppe und de uf maroochydore go übernachte. de ersti teil hed au super klappet, denn noosa isch es paradies zum shoppe und geld usgeh, wenn mer wot. de zweiti teil hed eigentlich guet agfange, denn mier hend uf ahieb de caravan park in maroochy gfunde, doch de hed kei platz meh gha. de simmer zum nächste und au de hed nüd meh frie gha und ebeso de übernächst.... schlussendlich hend mier üs entschiede wieder uf noosa zrug z fahre (35min) und det d nacht z verbringe. so sind mier halt wieder zum gliche platz zrug gfahre wo mier scho am vorabig übernachtet hend.

cya

Hervey Bay, Part 2

24.12.09 - 26.12.09

Hervey Bay: am 24. hend mier chönne i üses apartment izieh und es isch hammer schön! aber vorher hend mier no müesse go poste, denn au da hend am 25. kei läde offe. doch mier sind ned die einzige gsi mit de idee no de fästtägs-schmaus go ichaufe und es hed hunderti vo lüüt gha und all mega gstresst. es isch also keis vergnüege gsi, drum sind mier froh gsi wo mier fertig gsi sind und hend üs de en abchüehlig im pool gönt. am abig hend mier zwei dvds gluegt und denn is bequeme bett go schlafe.

am 25. isch de aber glich nüd gsi mit usschlafe, will d vorhäng sind ned würklich licht dicht gsi und d sunne hed am morge früeh scho inegschihne. üse plan isch eigentlich gsi chle ad beach go sünnele und bädele. doch nachdem mier am morge mal ufgstande sind, s zmorge gesse und no id fimmerchitschte gluegt hend, heds dusse afah regnet und üse plan isch zerstört worde. drum hend mier no meh fernseh gluegt und chle ufem bett umegläge und wo s wätter wieder chle uftah hed, sind mier richtig beach gfahre und sind eifach chle go spaziere. es hed au no einigi anderi lüüt gha wo s gliche gmacht hend und a eim ort sind au no vill am fische gsi. wills scho richtig abig gange isch, sind mier de wieder hei gange und hend üses wiehnachtsässe kochet und no en dvd glueget und de scho gli mal is bett go chüssilose.

a alli dihei, mier wünschet üch frohi wiehnachte. cya

Hervey Bay, Part 1

22.12.09 -23.12.09

Agnes Water - Hervey Bay: am morge früeh hend mier s schöne agnes water verlah und sind ufbroche richtig hervey bay, wo mier d wiehnachte werdet verbringe. ufem weg zu üsere fästtägs-destination sind mier dur bundaberg gfahre. bundaberg -- klar de bekannti australischi zuckerrohr rum! aber bundaberg sälber hed au no meh z biete. persönlich hed mier d stadt sälber super gfalle. die ganz stadt hed fast so usgseh wie zu ziite vom goldrausch. d hüser sind anenand baut und guet erhalte, resp renoviert und modernisiert worde. natürlich hends mier üs ned lah entgah chle dur die city z schlemmere und i es paar shops go umenusche. mier hend aber im hinderchopf gha selbstverständlich au go d rum destillerie go aluege vo bundaberg. und so sind mier det angefahre und leider gits det nur all volli stund en füehrig und mier sind grad cchle nach de 11i acho. drum hend mier halt en stund gwartet und s ziit im shop vertriebe. am 12i isch üsi tour los gange, doch us duftige gründ hend mier leider nur d hälfti vo de tour gseh. mier sind de wiiter gfahre richtig hervey bay, hend aber no en churze abstecher durs chline dörfli childers, wo im grund gnoh gnau glich usgseht wie bundaberg.

Hervey Bay: wo mier da acho sind, hend mier wie immer en caravanpark gsuecht und au gfunde. de simmer chle ade riesige, fast leere und wunderschöne beach go laufe und hend usschau ghalte nach me hotel wo mier üsi wiehnachte chönd "fiere". gfunde hend mier keis hotel, defür es wunderschöns apartment meh oder weniger grad am meer, mit me schöne pool und riesige zimmer.

am mittwuch (23.12.09) sind mier mitere gsellschaft uf en 1 tages trip uf d fraser island. das isch en insle wo nur us sand bestaht und grad vor de küste und hervey bay isch de usgangspunkt für all die toure. mier hend en super tag gha i dem 4 wheeldrive bus und sind mit 80 km/h über d beach brätteret. aber au dur de rägewald sind mier gfahre und will alles nur sandstrasse gsi sind isches immer chle rock'n'roll gsi.

gruess us em heisse down under und ganz schöni fästtäg. cya

Agnes Water / Town of 1770

20.12.09 - 21.12.09
Rockhampton - Agnes Water: Am morge sind mier wie immer go pöstele fürs zmittag und znacht. für das sind mier voll is stadtzentrum, will mier das eineweg no chle hend welle go aluege. aber rockhampton isch ned so schön gsi wie ich das erwartet ha. es isch en city us de ziit vom goldrausch und mer hed au s gfühl die stadt hed scho besseri ziite gha. uf die ander siite heds aber no es paar altimodischi hüser wie würklich no usgsehnd wie anno dazumals wo d goldgräber no s zepter i de hand gha hend.
eigentlich hend mier welle zwei nächt in rocky bliebe, aber will d strasse im nöchglägnige tableland ned all asphaltiert sind hend mier üs umentschiede und sind uf yeppoon und de vo det de küste entlang uf emu park und wieder zrug uf rocky und wiiter nach gladstone. und was mier gseh hend isch traumhaft gsi. yeppoon isch es chlises, härzigs dörfli und de küste entlang heds hammermässigi stränd gha! isch also nume wiiter z empfehle die route. de weg uf gladstone isch nüd speziells gsi, ussert villicht dass es einisch grägnet hed was es nüme hed chönne und de highway scho schier halbe unter wasser gstande isch... z gladstone acho, hend mier müesse feststelle, dass das meh oder weniger nur en industrie stadt isch und überhaupt nüd schöns. drum hend mier üs entschlosse no wiiter z fahre richtig agnes water und town of 1770.


Agnes Water und Town of 1770: das sind zwei dörfli grad näbenand und hend en super schöne strand wo mer au chönnt go surfe. es hed au es paar chlini shops und restaurants. doch de campingplatz wo mier aglueget gha hend isch voll überloffe gsi (wahrschindlich wege wiehnachte). aber mier hend no es caravanpark gfunde, nämlich en ganz en neue wo nonig guet beschriftet gsi isch und drum au ned so vill lüt gha hed und er isch grad ade beach. mier hend üs entschiede da zwei nächt z verbringe in agnes water, dass mier de über wiehnachte in hervey bay sind.
hüt sind mier wiedermal go ichaufe am morge und de hemmer gwäsche. währeddem d wösch ob gsi isch, sind mier ufem golfplatz es paar bäll uf de driving range go abschlah. jetzt sind mier am z nacht choche und wösch hänke und morn gahts wiede wiiter.

gruess + cya soon

Rockhampton

19.12.09
Daydream island - Rockhampton: am morge sind mier no fast i stress cho, will mier hend die ersti fähre zrug nach airlie beach gnoh usem grund will mier no en meh als 6 stündigi fahrt nach rockhampton ufem plan gha hend. so sind mier mit de 7.35 fähre zrug zu üsem jucy camper wo am festland z airlie beach gwartet hed. nachem tanke hend mier au no d pneu pumpet und debie festgstellt, dass mier bis jetzt mit bis zu 10PSI meh reifedruck umegfahre sind als de maximal erlaubti reifedruck (gemäss hersteller ufem pneu) isch... denn isches losgange, immer gradus bis nach mackay wo mier de ersti stopp gmacht hend und go poste sind. denn wieder wiiter, stunde lang mit 100 km/h über de highway kroset...

Rockhampton: nach guet meh als 450 kilometer sind mier de in rockhampton itroffe und grad mal als ersts go tanke. churz drufab hend mier no bekanntschaft mit de polizie gmacht, wo en kontrolle gmacht hend und drum han ich halt dene schnell is röhrli blaset und ghoft das es d cocktails vo de vergangnige täg ned azeigt ;) nachdem mier au das natürlich perfekt gmeisteret hend isch de spass rockhampton erst so richtig losgange. mier hend im reisefüehrer en caravanpark gfunde und hend au de welle afahre. de name vo de strass hend mier igäh im tomtom und de druflos gfahre. jedoch sind mier voll im chrut usse gsi und überhaupt ned det wo mier hend welle sie. das ganze spieli hend mier de no mit de koordinate versuecht, wills de strassename ned gfund hed und wo sind mier glandet? natürlich wieder im niemandsland! mit vill glück hend mier de platz de doch no gfunde und sind froh gsi wieder "feste bode" under de füess z ha. mier sind au rächt teig gsi und hend am abig no es bierli trunke währedem dvd luege und de au scho gli mal ipfuset.

cheers + cya

Daydream Island

17. - 19.12.09
Airle Beach - Daydream island: am morge sind mier früeh ufgstande, dass mier s boot zu de insle au ja ned verpasset und mier hend au no en parkplatz brucht für die ziit. zum glück heds bim hafe grad no eine frie gha und de hend mier i-checked bi üsere fähregsellschaft und die hend üs d koffere abgnoh und mier sind ufs de catamaran.

daydream island: scho nachere halb stund sind mier acho und bi üsere akunft sind musiker im hawaii hämli parat gstande und hend üs und die andere gäst musikalisch begrüesst. leider hend mier ned grad i üses hotelzimmer chönne, aber das hed üs ned devo abghalte scho am morge am 11i de ersti cocktail z schlürfe und ade pool alag chle z sünnele. nachdem mier i üses zimmer hend chönne izieh, sind mier im pool go bade will momentan isch d stinger saison, dh es hed giftigi qualle und mer sött ned im meer go bade... aber de strand (alles abgstorbnigi koralle) und s himmelblaue meer sind fantastisch gsi. mier hend üsi zwei nächt und drü täg uf de insle gnosse und hend so richtig chönne relaxe bim sünnele und cocktali gnüsse :) doch au d ziit uf de insle isch wie im flug verbi gange und scho heds wieder gheisse us-checke.

cya soon

Airlie Beach

16.12.09

Townsville - Airlie Beach: ich nims scho mal vorweg, die zweiti nacht mit em venti isch einiges agnehmer gsi und nöme so heiss.

fast zur rutine isch worde, dass mier immer am morge no schnell gönd go üses zmittag, znacht und suscht no sache go poste. z townsville hend mier es riesigs ichaufscenter gfunde und mier sind au det go poste. mier hend au nach me elektronik lade usschau ghalte, will mier ja immer no keis navi gha hend. aber zu üsere überraschig, es elektro gäschaft hend mier ned gfunde, nur die wo natel verchaufet und villicht no kameras. mier hend üs de doch ufe weg nach airle beach gmacht. d fahrt isch ned so agnehm gsi, will es hed immer gwindet. und es isch scho erstundlich, dass ned meh unfäll passieret uf dene highway, will de zuestand vo de strasse isch mängisch würklich fraglich und de tonneret eim immer no gigantischi trucks entgege. uffallend isch au gsi, dass es immer wie trochner und brüner worde isch umso wiiter mier gäge süde gfahre sind. en stopp hend mier de in ayr und in bowen gmacht. ayr isch es es chlises härzigs städtli, aber mier hend det eigentlich nur ghaltet will mier ufs wc hend müesse und mier grad de einzig elektro lade wiit und breit gseh hend. es kabel hends ned gha für üses alte tomtom, aber sie hend grad es tomtom navi für d hälfti vom priis im agebot gha und de hend mier halt es neus kauft. in bowen, isch meh es kaff aber mit me super schöne strand, sind mier chle de beach entlang gloffe und de wieder gange.

Airlie Beach: nach guet 5 stund reis sind mier in airlie beach acho. de ersti idruck: turistisch aber wunderschön. es isch au en chlini stadt, aber wills de usgangspunkt zu de malerische whitsunday islands isch, isches eher en ort für richi lüüt und natürlich backpacker :) mier hend üse jucy uf me parkplatz abgstellt und sind richtig städtli gloffe. det hend mier en chline shop gfunde wo mer alles chle cha bueche. mier hend die frau det nach me günstige agebot für zwei nächt für eini vo de whitsundy islands gfragt und hend es guets agebot gfunde. meh dezue im nächste blog...

nachem bueche hend mier en caravanprak ufgsuecht und de mal znacht gässe. vorem schlafe hend mier en dvd gluegt denn üs ufs ohr ghaue und de devo träumt wie mier zwei am nächste tag zum paradies fahret...

gruess and cya later

Townsville oder auch Brownsville

15.12.09

Mission Beach - Townsville: hüt am morge sind mier zerst mal go dusche und de hemmer zmörgelet. nachher simmer go poste und will mier scho no chle füx sind, hend mier es kabel und en chline ventilator kauft für d nacht :) nachem tanke hend mier üs ufe weg gmacht. mier hend scho gwüsst das es lang isch, aber so lang... mier sind gfahre und gfahre und es isch eifach immer nur gradus gange und mier sind mit 100 km/h über de highway brätteret. nach öpe 2 stund sind mier un ingham acho, aber das städtli hed mier überhaupt ned gfalle. was im reisefüehrer "lonely planet" staht, chan ich nur bezüge, nämlich dass d uhr i dere stadt 1950 ughört hed schlah... nacheme churze stopp det isches wiiter gange richtig townsville und nach guete 1,5 stund sind mier de endlich acho.

Townsville: mier sind grad richtig city inegfahre, will mier hend s reef aquarium welle go aluege, aber zerst sind mier no chle im gago umegfahre. de hend mier eifach mal s autoabgstellt und gloffe und de hend miers au gfunde. nach üsem bsuech dete hend mier üs uf d suechi nachme campingplatz gmacht und was mier gfunde hend isch sensationell! mier sind im coral coast, chle usserhalb vo townsville, aber de receptionist isch mega hilfsbereit gsi und hed üs no tips gäh. drum sind mier nachher no einisch id stadt ine und det uf de castle hill. vo det hesch en atemberaubendi ussicht uf ganz townsville.

so mier sind jetzt wieder im bett und hoffet de venti macht sini sach guet...

cya

Mission Beach

14.12.09

so hüt startet üsi reis richtig süde resp. richtig sydney. doch aller anfang ist schwer... will mier ned übermässig vill platz hend i üsem camper, hend mier 1 koffere mit de greyhound bus-organisation ufgäh nach sydney. doch bis mier das endlich hend chönne sind mier öpe i drü verschidnige greyhound office ine gsi und dur halb cairns gsecklet. schlussendlich heds de aber doch no klappet und mier hend üse jucy camper abgholt und de isch ned so schlächt mit usnah, dass er immer es bitzeli links zieht bim fahre... und wo mier s navi hend welle installiere a üsem camper, hend mier müesse feststelle, dass die australisch charte ned drufe isch, obwohl mier die dihei no glade gha hend.

Cairns - Mission Beach: eigentlich isch üses erste etappe ziel townsville gsi, aber da mier no sache hend müesse go poste und im greyhound nahgsecklet sind, hend mier beschlosse ned no die 5 stündig reis nach twonsville i agriff z näh, sondern en dass mier en zwüschestopp in mission beach ileget. ufem weg sind mier no d boulders gorge und d josephine falls go aluege, wo würklich schön gsi sind.

villicht da no schnell es wort zu de australiesche strasse. eigentlich isches en katastrophe, de highway isch so löchrig wie en schwiizerchäs und fast so schmal wie de rank ums schmidtli im alose obe, aber mer cha glich mit 100 km/h duretäsche.

Mission Beach: isch es chlineri ortschaft wo ned so vill lauft. mier hend i üsem reisefüehrer en guete caravanpark gfunde und hend de de agfahre. ufem dunk island view park isch de au no es plätzli frie gsi und so hend mier das gnoh und üses auto abgstellt. mit üsem integrierte gas chocher im kofferrum hend mier s znacht kochet und de sind mier scho gli mal is bett. leider isch ned so vill gsi mit schlafe, will es isch abartig heiss gis im van! und mier hend gschwitzt wie affe und hend versuecht üses auto chle durezlüfte. es paar stund spöter sind mier vor luter erschöpfig doch no igschlafe.

cheers + cya

Exams, fun and packing

üsi letschti wuche in cairns isch nomal so richtig busy gsi...

zwar hed d wuche ganz gmüetlich agfange am mändig. mier sind id schuel für die bevorstehende prüfige go lerne. aber nur am morge und am nami hemmer üs chle usgrueht.

am zischtig isch de tag, uf de wo mier üs 12 wuche lang fest druf vorbereitet hend, da gsi und mier sind vo üsere lehrerin id city gfahre worde wo mier üsi exame gha hend. mier hend d prüfige im hotel sebel gha, es mega ding und hammer schön. jedoch sind mier fast verfrohre will d klimalag fast überstrapaziert worde isch. aber im grosse und ganze sind d tests guet gange und mier wartet jetzt bis im januar und hoffet mier bechömed denn en positive bricht.

nach üsne exame hend mier scho wieder anders plant gha. und so sind mier am mittwuch üses taucherbrevet i agriff gnoh. zerst zwei täg theorie- und pooltraining und am fritig und hüt simmer no je 2 tauchgäng im great barrier reef gsi go mache. isch absolut super schön gsi! mier hend de nemo gseh, roche, schildkrote und vill anderi farbigi fisch. üse tauchlehrer isch sogar no vomene tiggerfish agriffe worde :) aber schlussendlich hend mier beid jetzt s padi open water certificat.

am fritig abig hend mier zwei no die ganz familie meier mit ahang zumene znacht usgfüehrt. gspiese hend mier ineme italienische restaurant in palm cove. am samstig hend mier de müesse alles mal chle packe und vorbereite für d reis, obwohl all andere a lake tinaroo sind go wakeboarde und was üs scho au chle gfuxt hed...

so das wärs gsi vo cairns, aber kei angst ich wird au ufem weg nach sydney fliessig öpis in blog schriebe.

cheers + cya

Speaking-Exam, Graduating, Wakeboarde und Shopping Marathon

yeah mier hends gschafft, fertig schuel! 12 wuche sind wie im flug verbie... jetzt stönd üs no de rest vo de prüfige bevor und de ab richtig sydney.

ide letschte schuelwuche hend mier nomal einiges erläbt. wie ich scho erwähnt ha, hend mier am zischtig d speaking prüfig gha ide stadt. eigentlich wär ja nur ich und d mirjam d gruppe gsi, da aber ide nicole (das isch die ander schwiizeri vo üsere schuel) ihre speaking partner ned cho isch, sind mier de halt schlussendlich en 3er gruppe gsi. aber das isch eigentlich no guet gsi. au d exame isch relativ guet gange, mier hend üs de frage vo de expertin gstellt und hends gmeisteret. am nächste tag han ich vo üsere lehrerin erfahre, wo die expertin kennt, dass sie ursprünglich en dütschi isch :) währendem mier bi de test absolviert hend, isch de rest vo de klass mit de lehrerin go minigolfe. und am namitag hend mier de üs alli troffe und sind zäme is kino go de zweiti teil vo twighlight.

am dunnstig abig sind mier und fast all andere vo de jcu (james cook universitiy) no i usgang, will am dunnstig isch immer ladiesnight und de gits überall so spezial agebot. und will es paar halt au knapp bi kasse sind, isch das dene gras gläge cho, dass fast all drinks für 1 dollar becho hesch... mitem letschte bus chle vor de 12ne sind mier de hei gange.

s ufstah am nächste morge isch mier aber au scho ringer gfalle, aber im verglich zum nächste morge isch das ja no peanut gsi ;) am fritig isch de nöme vill gsi mit schuel, am morge hend mier zwar no schuel gha ufem stundeplan, defür sind mier am namitag bim naheglägnige cable ski go knee- und wakeboarde. das isch würklich lustig gsi und wo mier zrug cho sind, sind eigentlich scho all parat gsi zum üs verabschiede. d lehrerin hed sogar no chle chips und nüssli uftischt und de isch eine nachem andere verabschiedet worde und hed sies zügnis becho und no churz öpis gseid zu de andere mitschüeler. am abig ishc üsi ganz klass und zwei lehrerinne ade trinity beach go ässe und spöter sind mier junge no wiiter id stadt und hend nomal die andere vo de schuel troffe. es isch no en füecht fröhliche abig worde und mier sind ned so früeh hei.

aber am nächste morge hed am 6.30 au wieder de wecker glütet, will mier hend d möglichkeit gha mit meiers mit zum lake tinaroo go wakeboarde und tube. am 7i sind mier abgfahre und hend die ander schwiizeri ufglade und sind richtig see gfahre. det hend mier en stahlblaue himmel gha! wakeboarde isch de pläsche gsi, will s boot (es tigé) isch würklich de börner und au s tube isch chräfteraubend gsi, so dass mier all am nächste tag mit muskelkater ufgstande sind.

am sunntig sind mier ned uf de fule hut gläge wie au scho, sondern sind id stadt go shoppe. mier sind sehr erfolgrich gsi. mier sind schliesslich au öpe 9 stund unterwegs gsi :)

so das wärs wieder us down under.

gruess + cya

Heiss / Gamble

lago mio, jetzt hend mier nur no 1 schuelwuche vor üs... und au scho die erste exame! nämlich am zischtig hend mier d speaking prüfig und müend ide stadt üsi english kenntniss unter bewies go stelle. und wies de "zuefall" grad eso will, bin ich mit de mirjam zäme bim test :)
und jetzt wirds richtig heiss da in down under... also d hitz isch ned so schlimm, aber eifach die hochi luftfuechtigkeit und de erschlahts eim fast und mer schwitzt nur scho bim nud mache.


die wuche hend mier üs no wiiter fliessig vorbereitet uf üsi prüfige wo immer nöcher chömed. mier schriebet au sicher pro wuche 3 briefe, gschichte oder was au immer zum üebe. suscht isch jedoch au idere wuche ned vill speziells los gsi. ussert villicht das mier am ziischtig abig nach de schuel id stadt sind und gueti 2500.- ärmer sind sit denn. mier hend nämich no de reste vo üsem campervan zahlt. (s konto für allfälligi spände gib ich unde ah :P). ich mache jetzt grad en sprung zum fritig. am abig sind mier dihei bliebe und ich ha s znacht kochet. und mit dem znacht hani au es bizeli heimat kochet, denn ich ha s guete alte henggeler husrezept "serbische ries" gmacht. und es hed allne gmundet :) de rest vom abig hend mier no färnseh gluegt und öpe es bier trunke.

am samstig isch mission "gschänkli poste" agseid gsi, denn für de yu isches s letschti wuchenend hie in australie gsi, will er am nächste samstig scho wieder zrug flügt. drum hend mier ihn i DFO (direct factory outlet) begleitet, wos verschiednigi läde hed mit günstigere sache. er hed für sini schwöstere es paar t-shirt brucht und drum isch d mirjam churzerhand id modelrolle gschlüpft und hed alles mal chle aprobiert gha.

am abig sind mier no is casino chle go gamble. leider hed de yu ned so erfolg gha, defür heds bi üs ned so schlächt usgseh am schluss. mier hend mit 50 dollar gstartet und hend chle roulett gspielt und es hed sit afang ah klappet. mier hend immer grösseri türm vo chips vor us gha und hend de mal mit 205 bucks ufghört. leider hend mier nachher s glück nachher nomal welle usefordere und hend de 40 bucks i sand gsetzt, aber trotzdem sind mier mit 115 dollar meh usem casino gloffe und hend so z säge grad de abig finanziert gha :)
nach üsem casino ufenthalt hend mier no wiiteri schuelkollege troffe und hend üs is nachtläbe gstürtzt. zerst hend mier en i club underem casino welle, eifach mal öppis nüs usprobiere, aber wo mier de itritt zahlt gha hend und unde im club gsi sind, isch eifach niemert andersch det gsi und mier hend de club für üs elei gha... nachme churze drink sind mier de wieder gange und hend en andere club ufgsuecht und det use abig verbracht.

und hüt hend mier eigenltich welle usschlafe so guet das es gaht, aber mier sind vom BJ und vom armani gweckt worde. de armani isch im cedric sinere fründin sinere schwöster ihres 1 jährige chind und d muetter hed das chind für 1 wuche de schwöster gäh, also hend mier jetzt au no es chind im hus. wie au immer, mier hend de rest vom tag verbracht mitem chline knirps chle z spiele und umezligge. ussert am abig sind mier no ad beach gloffe und hend det es glace gnosse.

so das wars scho wieder. ich gha jetzt go pfuse

cheers mate + cya

PS. hüt isch wieder en chillers meisterschafts rundi, drum hopp chillers!!

Geburstagsfier ufem Schluchboot

es isch scho wieder en wuche ume und mier chömed de reis immer nöcher. aber zerst heisst jetzt no zwei wuche chle büffle für d prüfige.

die wuche isch ganz im zeiche vo mirjam ihrem geburtstag gstande. mier hend üs entschlosse, dass mier a ihrem geburi gönd go river rafte. mier hend üse japanisch schuelkollege gfragt, de cedric und sini fründin und schlussendlich hed sich de röbi au no entschiede dass er au no mitchund. und via d martha hend mier de trip chönne bueche, denn sie hed en kollegin wo so sache macht und de zieht sie det eifach ihri provision ab und drum hend mier de trip 15% günstige chönne bueche. und mier hend ned eifach so en normale trip gnoh, mier hend üs für de extreme entschiede :) dementsprechend han ich mich au chle mulmig gfühlt gha, will mier halt ned gwüsst hend was uf üs zue chund.

aber alles voreweg. am fritig abig sind mier dihei bliebe, will mier am samstig morge hend früeh uf müesse, denn am viertel ab 6i isch scho besammlig gsi. aber au no en andere grund hed mich diheime bhalte. ich ha de mirjam versproche, dass ich ihre en chueche bache uf de geburtstag und das hed sie natürlich bim wort gnoh. zum glück isch mis liebe mameli grad no im skype gsi und sie hed mier chönne es guets kaffi chueche rezept zueschicke und ich ha de das (so guet dass es gange isch) i tat und warheit umgsetzt.

am samstig morge, ebe am tag vo de mirjam ihrem burzeltag, sind mier mit me car richtig misson beach bracht worde, wo mier de au de ganz tag ufem tully river verbracht hend. und wo mier em fluss entlang zum start gfahre sind, heds no es paar schilder gha wo drufe gstande isch: achtung crocs :) und au de yu hed mier ned grad muet gmacht. er hed mier gseid vor es paar mönet siget i dem fluss bi somene trip zwei koreaner umcho. aber am start acho, hend mier helm und schwimmweste gfasst und de ab is boot. und es isch würklich super gsi! s einzige wo chle schad gsi isch, s wetter isch ned würklich guet gsi, im gegeteil es hed grägnet. aber das hed nüd gmacht will mier sind ja eineweg nass worde. und mier sind ned nur de fiver abe sondern will mier d extreme version buecht hend, sind mier erstens nur 3 boot a je 6 lüüt gsi (plus je no 1 füehrer) und mier hend vill meh chönne mache als die normal tour. zum biespiel hend mier a zwei verschidnige orte chönne rock jumping mach, da bisch vomene 5 meter höche fels abegsprunge oder binere stromschnelle hesch chönne aberuschte und unde heds dich unders wasser zoge und nach 5 sekunde wieder usegspickt. insgesamt sind mier öpe 5 stund ufem wasser gsi mitere chline mittagspause wos en hamburger gäh hed. und es isch vo üs au niemert versoffe und nach de tour isches is pub gange, wo mier no hättet chönne föteli chaufe für 100 dollar. das isch üs aber z vill gsi, aber mier werdet das suscht immer i erinnerig bhalte.

ufem heiweg hend die meiste gschlafe und zrug bi s meiers sind d spaghetti parat gstande und natürlich min chueche, wo ned mal so schlächt usecho isch :) und am abig sind mier no i usgang.

de hütig sunntig hend mier mit schlafe, lerne, esse und mit me skype versuech mit de eltere vo de mirjam verbracht.

und jetzt bini müed und gang go pfuse uf betthuse.

cya

perfekti Rösti, Ladies Night and Kuranda

saluti, es isch scho wieder en wuche dure und mier hend nur no grad 3 schuelwuche vor üs. id letschte isch wieder einiges gloffe, will mier einigi spezielli sache mit de schuel unternoh hend.

bis am mittwuch isch eigentlich meh oder weniger alles normal und standart mässig abgloffe, ussert das es halt immer wieder chle öpe grägnet hed, was wiederum de natur sehr guet tah hed und jetzt wieder meh oder weniger alles grüen isch. aber es isch au ned so luschtig, wenn du im räge stahsch und uf de bus wartisch wo so sit 10 minute hät sölle cho... aber lieber nur spöter cho, als das wo de schuelkolleg erläbt hed. er hed nämlich mitem bus id stadt welle und plötzlich hed de bus afah schlangeliene mässig fahre. vor ihne isch zum glück grad es rotliecht gsi und de bus hed müesse ahalte und wos de zum stillstand cho sind, heds grumplet! jetzt isch doch tatsächlich eifach es rad vom bus gfalle...

wie au immer, mittwuch abig han ich mit de mirjam no es paar rösti müesse choche für d schuel. mier hend ebe abgmacht, dass jede schüeler und au d lerherin vo üsere klass öpis mitnimt. drum hend mier 1,5 kg härdöpfel kochet und zu zwei feine, gold-brune rösti verarbeitet und es isch alles gässe worde! d asiate hend scho freud gha a de rösti und de lehreri ihres chicken stroganoff hed natürlich super dezue passet. und au de japaner hed sich als kompetente choch usegstellt, denn sini nudle mit paprika, beef usw sind sehr guet gsi. de koreanisch mit schüeler hed öpis sushi artigs mitgnoh, aber es isch ned rohe fisch gsi sondern thunfisch, und das isch eigentlich au no schmackhaft gsi, wenn er ned so krabbe fleisch ine grüehrt hät. aber s highlight isch eidütig s toblerone schoggi mousse gsi! (en tipp a all: vo dene 300 gramm schoggi, ned nume toblerone sondern no 50 gramm lindt schoggi mit orange gschmack näh -> mega giga fein!!).

no vollgfrässe vom mittag sind mier am abig is swiss inn ide city go z nacht ässe. d schuel kollegin hed üs und au no ander (vill anderi schwiizer vonere andere schuel) iglade für es schwiizer z nacht. de yu (japanisch schuelkolleg) hed so freud gha a sim züri gschnätzlets und au d bratwurst wo er vo mier probiert hed, hed ihm es lächle is gsicht zauberet. nachem znacht isches wiiter gange is wool shed, wo jede dunnstig ladies night isch und d fraue chönd für 5 bucks so vill champagner go hole wies wend.

am fritig isch halt de die ganz klass chle müed gsi, aber das isch ned so schlimm gsi, will mier hend zum zmittag es barbie gha vo de schuel us und de ganz nami no en social event mitme quiz. und zuefälligerwies isch halt grad a dem tag en höche boss d jcu (james cook university) cho inspiziere mit sim team ;)

das wuchenend isch super schöns wätter gsi, jedoch hend mier ned vill schlaus gwüsst mit dem azfah :) am samstig hend mier mis velo gflickt, wo scho wieder en platte gha hed und jetzt scho wieder eine hed... vorher sind mier aber no chle is gym üsi föhrigi energie go uselah. mier sind de chle uf de schnorre gsi und hend drum en ruhige abig gmacht und sind ned weg gange.

und hüt isch eigentlich scho fast en familie usflug gsi. mier sind mit meiers (röbi, martha, cedi und sinere fründin) uf kuranda chle dur die hippie läde go stöbere. hehe und ich ha mitem röbi dörfe i sim neue ute mitfahre... en holden SS V8 mit öpe 350 PS, das hed eim also grad chle i sitz drückt wenn er mal chle ufs gas isch.

leider isches das scho wieder. danke fürs läse und en gueti ziit. cya

Chrank, Kino und feine Zopf

hüt isch wieder en sunntig wo mich extrem fuxt, will ich gnau weiss dass momentan d chillers z root am unihockey spiele sind... aber ich ha glich au no es paar sache zum verzelle.

mier sind ja s ganze letschte wuchenend chrank im bett gläge mit fieber, chopf- und halsweh. mier sind gli wieder einisch überem berg gsi, dh üs isches scho gli wieder besser gange, aber mier sind am mändig glich beid no dihei bliebe zum üs chle schone. ebefalls hend mier die wuche ufs velo verzichtet, will das villicht no chle z sträng gsi wär, will mier hend doch immer no en hueste wo üs chle plaget und de ander grund isch, will ich wieder mal en platte ha obwohl ich sit meh als einere wuche s velo nöme brucht ha :)

am zischtig sind mier de wieder id schuel und hend festgstellt, dass au imene andere schuelkolleg ned so wohl isch, aber de depp (schlitzaug halt) isch lieber id schuel und hed sich durequält als dass er dihei bliebe wär. de rest vo de wuche isch de riebigslos abgloffe, vorallem bim koreanische kolleg, will de chle "the shits" gha hed :)

am fritig abig sind mier dihei bliebe, will üs nonig ganz nach party gsi isch und mal en ruhige abig tuet au (im geldsäckel) mal guet. am samstig sind mier defür ned uf de fule hut umegläge, sondern mier sind gäge mittag richtig city, will mier mitem schuelkolleg für is kino abgmacht hend. also eigentlich wär planet gsi, dass mier a lake tinaroo gönd am samstig chle go wakeboarde und fun ha. jedoch hed s wätter en strich dur d rächnig gmacht (aber es rägnet ja nie gell mami), also d wätterprognose sind gar ned guet gsi, aber am samstig sälber isches de eigentlich no schöns wätter gsi. heja aber es hed au öpis positivs, ich ha mier nämlich so richtigi aussie boots bstellt, wo ich de ide schwiiz im winter cha alegge. leider hends die wo ich ha welle ned grad a lager gha, aber i öpe 3 wuche söt ichs übercho :)

uf das abe bin ich d mirjam und de yu (das isch de japanisch schuelkolleg) is kino de film vom michael jackson "this is it" go luege und am abig no mit me wiitere kolleg go s cairnser nachtläbe go unsicher mache.

s hütige zmorge isch also sehr erwähnenswert, will mier hend en guete alte zopf gha, wo d martha ide stadt bimene schwiizer bäcker kauft hed. und pflichtbewusst wie mier sind hend mier no üsi husi vom weekend erlediget und eifach chle umeghanget, will hüt heds würklich grägnet, besser gseit es hed gschüttet wie us chüble. aber das hed üs ned gross gstört, will mier söttet eh wieder mal üses zimmer chle ufruume und putze ;)

gruess us down under and cya

PS: hopp chillers!!

PPS: mier hend jetzt scho 8 vo 12 schuelwuche hinder üs... time flys!

Tableland & Glüehwürmli

hi mate, schön dass wieder mal uf üsem blog verbieluegsch :)

wie ich im letschte itrag scho akündet ha, hend mier am mändi und zischtig vo dere wuche üsi zwüscheprüfige gha. die prüfige zählet ned zum schlussergebnis, die sind meh dezue dah, dass gsehsch wod stahsch und dass au d lehrer gsehnd was mer no meh muess mache und schlussendlich au dass gsehsch dass scho einigi fortschritt gmacht hesch. de letschti teil vo de prüfige isch speaking gsi und det hends üs gfilmet und natürlich hend mier die lustige ufnahme au usgwärtet.

am mittwuch morge isches de losgange. mier hend bi de uni gwartet bis üse lehrer mitem mietwage ufkrüzt isch und de simmer richtig tableland gfahre. s tableland isch s hochland vo cairns und isch vom klima sehr speziell, denn i nur einere stund chasch vo de wet tropics id dry tropics fahre. und a teilne ort isch s klima verglichbar mit de schwiiz.

s hostel wo mier übernachtet hend hed "on the wallaby" gheisse und das liehd in yungaburra. gäge mittag sind mier det itrudlet und hend mal üses zimmer (!) bezoge. mier sind chle erstunt gsi, dass mier für die ganz klass und em lehrer nur eis zimmer zur verfüegig gha hend. aber das isch halt aussie style - easy-going - und de teilet halt d jungs, d mädels und de lehrer es zimmer mitenand.

nachdem mier üsi zimmer mit de koffer wo mier mitgnoh hend vollgstopft hend, sind mier an lake eacham go de lunch habere und no schnell go bädele. ebefalls sind mier no de cathedral fig tree, wo ähndlich isch wie de curtain fig tree, go agluege. und vorem znacht sind mier am bach wo dur yungaburra flüsst entlang gloffe, will det ine heds platypus! das sind uf guet dütsch gseid schnabeltier und bevors idunklet hed hend mier au no es paar z gsicht becho. zum z nacht heds de leider es ned so überragends BBQ vo üsem hostel gäh, was üs aber ned abgschreckt hed am abig en night canoening tour ufem naheligende lake tinaroo zmache. das isch es super erläbnis gsi und mier hend opossums gseh ide bäum umechlädere, en platypus hemmer nomal gseh und en echidna (ameisiigel) womer nur extrem selte gseht (also üse füehrer hed so eine au no nie gseh bi sonere nacht tour).

am nächste tag hend mier zerst am morge en rückblick gmacht uf die zwüscheprüfige wo mier gha hend und denn sind mier de milla milla fall go aluege. en wunderschöne wasserfall, nur momentan ischs so troche dass de fast kei wasser gha hed... wiiter isches gange zunere chäserie wo en schwiizer füehrt und det hend mier dörfe chäs degusterie und de tilsit isch also am tilsiter nöch cho und de heritage am gruyere au. aber die mached ned nur feine chäs sondern für australischi verhältnis au sehr schmackhaft schoggi. aber au nur will die nachem schwyzer felchlin rezept ihri schoggi mached - schwiizer schoggi isch und bliebt halt eifach die best, das hed mier au de japanisch mitschüeler gseid wo ich ihm mal chle lindt schoggi zum probiere gäh ha.

am dunnstig abig hend mier ufs BBQ vom hostel verzichtet und hend üsi eignige spaghetti bolognese à la aussie art gmacht, nämlich mit ghacktem kangaroo und das isch mega fein gsi.

und scho isches wieder fritig gsi und mier hend wieder üsi sache müese packe und sind richtig uni gfahre. aber unterwegs hend mier no en halt binere kaffi plantage gmacht und bimene park wo mer d möglichkeit hed wallabies z füehttere. und de park bestaht also nur us vulkanstei sowiit wie gsehsch und mer chönt sich also guet verlaufe...

mier hend im grosse und ganz en super trip gha, ussert und ja jetzt chunds, mier sind die letschte täg nöme ganz fit gsi. also mier isches sit am fritig morge nöme so guet gange und de mirjam scho sit am dunnstig morge. mier hend irgend es grippi ufganglet wo momentan d rundi macht und drum hend mier jetzt s wuchenend meh oder weniger nur im bett verbracht und chle vor üs aneglüeht. aber mier sind

wieder ufem weg zur besserig!

gruess us down under and cya

üsi unterkunft bi de chäserie

währed de jagd ufd platypus en platypus

milla milla fall rock wallabies

mit me chline im bütel

Räge / BJ

min hütig blog itrag start ich mit me zitat: "nei, en rägejagge bruchsch ned, wenn iher z australie sind, denn rägnets nie." jaja mami da hesch du mier en super tipp mitgäh. will am mändig morge heds no so usgseh, als obs en schöne tag würd gäh und mier sind wie gwohnt mitem velo id schuel gradlet. uf d sekunde wo mier det acho sind, heds abeküblet was hed möge... meh oder weniger de ganz tag. aber was üs agschisse hed, hend vill ächti aussies freud gha, denn das isch de erst richtig räge sit 6 mönet!! aber mier zwei hend es riese schwien gha, will nach de schuel heds so z säge für üs wieder ufghört gha rägne und mier sind troche dihei acho. aber am nächste tag sind mier glich vorsichtshalber mitem bus id schuel, aber das wär nöme nötig gsi, denn es isch wieder super wetter :)

suscht hani nüd speziells z verzelle, will wenn mier ide schuel hocket chömmer ned vill ufregends erläbe. aber das git mier d glägeheit über chle allgemeins z schriebe. zum biespiel han ich no nie erwähnt, dass mier bis meiers zuwachs becho hend... sie hend nämlich sit 5 wuche en junge berner sennehund mitem name BJ. de isch also ober schnüsig und en mega glatte, jedoch sind mier meistens die erste wo dihei sind und hend drum amigs s vergnüege chle s zügs zäme rume und momentan will er nonig ganz stuberein isch no chle sini teichli zäme z putze wo er amigs hinderlaht. aber er lernt schnell und für das dass er nur 12 wuche alt isch, isch er ganz schön clever und weiss scho ganz gnau wie sin hundeblick izsetze :)

au das wuchenend hend mier ned so vill unternoh, mier sind meh dihei gsi. am samstig morge sind mier, nachere durchzechte nacht will es paar studente de letschti schuelltag gha hend, chle is gym go trainiere und am nami chle id stadt go lädele. und am abig hends mier au ruhig agange und sind dihei bliebe und hend en film glueget. au de sunntig isch ganz im zeiche vom "chille" gstande.

und jetzt söt ich no chle lerne, denn morn (mändig) und am zischtig hend mier üsi zwüscheprüfige und nachher gahts für drü täg ab is tableland mit de klass und em lehrer chle go erhole vo de erste 6 schuelwuche, eifach chle spass ha zäme und natürlich au es paar sache go aluge, wie zum biespiel de curtain fig tree wo mier scho mal sind go aluege :)

also das wärs wieder gsi, gueti ziit und cya

BJ

Pneuverschleiss und Sunnebrand

sodeli, es wieder mal ziit für en blog itrag, aber ich weiss ehrlich gseid hüt ned so was schriebe... aber ich fang mal ah und hoffe das mier scho öpis in sinn chund.

mier sind immer no ganz bravi studente a de james cook universität und lernet vill englisch, will mier sind ja nur no en 5er klass und de hesch fast 1:1 betreuig, was au guet isch, denn mängisch isches scho au chle härt ide schuel wenn all das grammatik zügs hesch und ich ha 4 jahr lang keis wort meh englisch gredet ussert villicht z irland ide ferie im pub wo ich es bier bstellt ha :)

ähm ja afangs wuche isch ned vill erwähnenswerts gloffe ussert das ich scho wieder en platte gholt han bi mim velo (ha letscht wuche scho mal eine gha) und das wuchenänd hed mier de röbi das gflickt und nach nume grad es paar stund hed de pneu scho wieder es loch gha, ohni dass öpert öpis gmacht hed...

und endi wuche hend üs es paar kollege verlah, wills wieder zrug müend. drum sind mier am dunnstig abig ane homeparty. de raul (spanier) hed hamburger, hot dog und sälber sangria gmacht und die wo hend welle hend no im jacuzzy chönne go bädele. mier sind aber ned lang gsi und no gli mal hei, will mier no schuel gha hend am nächste tag, aber es hed au ander gäh wo de fast direkt wieder id schuel sind oder gar ned... und am fritig abig hemmer no föhrig würst gha, drum simmer nomal es barbie go mache ide stadt (det heds au so öffentlichi gas grill) mit de schuelkollege und nachher no is gilligan's, das isch en bekannte backpacker nachtschuppe, en japaner go verabschide, wo leider au wieder hei muess. das sind zwei super floti type gsi!

am samstig morge sind mier sogar früeh uf, will mier no chle is fitness sind und nachher simmer chle ad beach und hend üs (also ich meh als d mirjam) debie en sunnebrand gholt, wo mier momentan no chle am uskurriere sind. aber wenn ich so uf de 20min homepage liese, dass iher ide schwiiz chalt hend und langsam scho schnee, de lauf ich no gärn chle as glüehwürmli dur d gägend :)

und am samstig abig isch au da in cairns nomal es oktoberfescht gsi und dasmal sind mier au inecho und de hend mier mitme japaner undere französin es paar wiesbier gstämmt. jedoch sind mier all chle vo de letschte nächt no chle müed gsi und sind drum öpe am morge am eis au scho wieder dihei gsi. da muess ich jetzt doch no amerke, dass es mich scho chle gfuxt hed, dass ich ned ha chönne mit de chillers as oktoberfescht z oberägeri...

de hütig sunntig isch ganz im zeiche vo relaxe gstande. mal usschlafe und eifach ned so vill schlaus mache (ussert d husi wo mier no gha hend :P).

so jetzt hani doch wieder en halbe roman gschriebe :) wünsche üch en gueti ziit, chle bessers wätter und bis zum nächste mal.

cya

Europe vs. Asia / Cedi 21

hello und grüezi. die wuche isch ganz im zeiche vo "europe vs. asia" und em cedi sim 21 geburi gstande, aber uf das chumi no spöter z spräche.

natürlich sind mier au die wuche immer sehr pflichtbewusst id schuel und mier lernet au vill. mier sind jetzt scho sit 4 wuche ide schuel und hend no 8 wuche vor üs...

am zischtig isch mier öpis unglaublichs passiert und es hed wieder mal zeigt, wie chli die welt isch. ich bi mit de mirjam dur d stadt zoge (natürlich nach de schuel) und de simmer ine didgeridoo lade. mier hend det chle umenand gschnäuget und de isch d verchäuferi cho und hed üs gfraget, ob sie üs cha helfe. mier hend de i üsem perfekte englisch gantwortet, dass mier eifach chle umelueget. uf das abe hed sie üs gfragt, vo wo mier chömed. mier natürlich immer no im englisch fluss, dass mier us de schwiiz sind. und de hed sie mit üs afah dütsch rede, will sie mal für en langi ziit in dütschland gschaffet hed. aber das isch no lang ned alles. sie hed so es fotialbum i ihrem lade, wo all die didgeridoo macher dinne sind (sind al vo de region) und au suscht no chle fotis vo ihrem lade. und de han ich das chle dure blätteret und de isch es bild vonere gruppe junge dame dinne gsi und irgendeini isch mier sehr bekannt vor cho. jetzt isch uf dem foti d tanja barmet (für die wo sie ned känned, das isch mim schuelkolleg franz sini fründin) gsi am didgeridoo dudle - en riese zuefall!!

de fritig isch ganz im zeiche vo "europe vs. asia" gstande. am morge hend mier ganz normal schuel gha, aber am nami hend mier vo de schuel us so en sozial event gha. das heisst d lehrer hend en chline fuessball match organisiert, ebe europe vs. aisa und all europäer hend miteme blaue shirt müesse id schuel cho und d asiate miteme wiese. natürlich hend mier die riisfanatiker mit 5:1 abeglah. aber s "chriegs bieli" isch de scho bim aschlüssende BBQ wieder begrabe gsi. Am abig sind eigentlich all zäme au nomal zäme cho und mier hend da ade trinity beach es paar (leider warmi) bier gstämmt und en gsellige abig gha, obwohl eigentlich alkohol trinke ide öffentlichkeit verbote isch. mier hend de eifach zu üsem schutz es alibi BBQ, bi de öffentliche gas-grillstelle wos ade beach entlang hed, gmacht.

gester samstig isch de grossi tag vom cedi gsi, er hed sin 21 geburi gfieret. das isch de wichtigsti da in australie, aber wieso gnau, das weiss au ned würklich... jedefalls hed er öpe 25 lüüt zum znacht iglade und für spöter sind so gäge die 50 persone iplanet gsi. mier hend am eigene lieb erfahre, was en echti aussie party isch und dass die liebe kollege vo down under vill möged trinke chamer sich vorstelle, aber grad so vill hani au ned dänkt gha... jedefalls sind im cedi sini kollege scho um die zwei ume ufkrüzt mit ihrne bier und vodka und hend scho mächtig afah gas gäh. das isch da eigentlich so üblich, dass jede sies z trinke sälber mitnimt und will all chle fuhl sind, chasch da scho fertig gmixti vodka lemon, wishky cola usw chaufe. und wos im die 6i mal öpis z ässe gäh hed, sind meh oder weniger scho all mitere schnappsnase umetorklet. das isch au keis wunder, will immer wieder hed eine so en schluch wo ob en trichter hed is muul gnoh und de hends dem en ladig verpasst. aber isch no lustig gsi, de ganz abig...

und hüt hemmer ned so vill gmacht, sind meh oder weniger chle umegläge und hend no de ufsatz für d schuel gschriebe. eigentlich hättet mier chle ad beach welle, aber es hed am morge immer wieder so 5min grägent gha und es isch au ned so warm gsi und drum hend miers de lah sie. so jetzt gits de grad znacht, das trifft sich grad guet, will ich weiss eh au grad nüd meh zum schriebe :)

cya und gueti ziit

PS hopp chillers!!

Hippie Market vs Crocodile Farm

hi mate, mier hättet zwar no husi z mache, aber iher wend ja au unterhalte werde ;)

also die wuche isch ned vill ereignisrichs gloffe. mier sind immer fliessig id schuel und am abig no üsi husi gmacht.

am mittwuch sind mier aber da im lokale fitness center gsi mal go luege und hend es abo abgschlosse für 10 wuche wo mier sogar es programm bechömed und mier sicher einisch i de wuche betreut werdet. das isch natürlich super, vorallem für mich, de chum ich wahrschindlich ned grad als chugle hei, wie vo es paarne siite scho gmunklet worde isch.

für das wuchenend hend mier üs vorgnoh es auto zmiete und ide region chle go umekurve. aber es auto zmiete isch eifach gseid als gmacht. mier hend am fritig chle googlet und uf de meiste websites gseh, dass mer es auto eigentlich erst ab 21 cha miete. es git aber eine wo chle älteri autos hed und det chamer au als unter 21 jährige es auto go miete. am samstig morge wo mier det sind go frage, sind die natürlich voll usbuechet gsi... sie hend üs aber no en adressi ageh vo eim wo villicht au no chönt vermiete für üs junge schnufer. mier hend gmeint gha es sig ganz i de nöchi und sind drum gloffe. 1 stund, ganz verschiwitzt und es paar absage vo andere vermieter spöter hend mier de yahoo car rentals mal gfunde und es wär au möglich gsi eis z miete. aber uf das agbot vo dem sind mier ned igange, da er ned würklich seriös gsi usgseh hed. es isch en ei ma betrieb gsi und sies hüsli sehr schmudlig und er hed au so usgseh, als ob er au no im horizontale buissnes tätig isch. mier hends de eigentlich scho ufgeh gha, dass mier no zumene auto chömed und hend no en letschte versuech unternoh, bevor mier suscht halt eifach währed go shoppe ide city. und tatsächlich hemmers de doch no gschafft! mier hend en knall rote hyundai accent becho, leider ned en automat, wie ich fürs erste mal linksverkehr fahre lieber gha hät. aber es isch de tip top gange, ussert das ich es paar mal d schiebewüscher brucht ha statt de blinker (die beide hebel sind au siiteverchert). und bevor mier de uf üse namittags trip sind, hend mier binere tankstell no churz de reifedruck nahgluegt und das hed sich no als gueti ziit investition usegstellt, denn bim hindere linke reife isch nur öpe d hälfti vo de luft dine gsi wo öpe hät sölle sie. nachdem mier de pumpet hend isch üsem reisli nüd meh im weg gstande.

mier sind richtig kuranda, wo mier de hippie market sind go aluege (sorry mama ich ha kei sone chüssiüberzug gfunde...) denn wiiter richtig mareeba, aber det hend mier kei halt gmacht, sindern eifach nur durekroset. in atherton sind mier de im spate namittag vom hunger blaget öpis go habere, aber de scho gli wieder wiiter richtig yungaburra. ufem weg det ane sind mier de curtainfig tree go aluege und de hemmer eigentlich s meiers welle go bsuehe wo s wuchenend am lake tinaroo verbracht hend. aber us ziit gründ simmer nur schnell verbiegfahre und wiiter zum lake eacham. das isch zwar nur en chline see, defür umso schöner! denn sind mier scho gli wider richtig cairns resp trinity beach karret, will mier am samstig abig mit es paar kollege ide stadt abgmacht hend.

und de abig wird üs au i erinnerig bliebe. mier sind mit zwei japaner und eim dütsche unterwegs gsi. und bekanntlich möged ja d asiate ned so vill bier vertliede und das hemmer de au gmerkt, will de eint nach 2 gläser scho rächt parat gsi isch und tanzed hed wie wild. zu wild für d security und mier sind usem erste club "gfloge" und im nächste club sind mier de au nur en stund gsi, bevor mier de wieder gange worde sind :) aber mier hends total lustig gha und es isch en guete abig gsi.

und hüt sunntig hend mier mitem dütsche abgmacht, also mier hend ihn in clifton beach ufglade und sind hend d crocodile farm wo ide nöchi isch als ziel gsteckt. bide hifahrt simmer grad no bimene buschfüür verbie gfahre (die hends momentan no vill, wills halt eifach furz troche isch). uf dere farm heds grad chle bröcke gha vo crocs... das isch sehr imposant gsi und d attack show und al das zügs natürlich au.

ja im spöter nami hend mier üse chlapf no volltanket und de simmerne go abgeh und de no es bitz go shoppe. und alles i allem hemmer es super weekend gha eifach chle mit alaufschwierigkeite :)

mou, das wärs scho wieder gsi, aber heut ist nicht alle tage, ich schreibe wieder - keine frage.

gruess us australie + cya

üse hiunday... hed scho fascht chle herman waser style :)

curtain fig tree bi yungaburra

lake eacham

ahhh d mirjam wird gfrässe ;)

croc show

schuel und oktoberfäscht

sodeli mier hend scho wieder en wuche hinder üs. mier sind natürlich fliessig id schuel und hend au am abig sicher immer no en stund müesse anehock zum all üsi husi z erledige. es wird au langsam aber sicher immer wie wärmer da bi üs in cairns. mier merket das rächt, will nach de schuel chömed mier meistens verschwitzt und luut chüchend vom velöle wieder bi üs dihei ah (defür blied mier villicht es bitzeli fit). will sportlich betätiget mier üs bis jetzt nonig gross, mier beschränkeds ufs velofahre id schuel und wieder zrug. aber das änderet sich wahrschindlich die wuche, will mier chönd da in trinity beach ines fitnesscenter chle go pumpe :) aber de mirjam isches au hie in australie immer no z chalt, denn sie lauft am abig vill mit ihrem dickste pulli ume, wenn die andere oben ohne oder mitem t-shirt umelaufed.

ide schuel isches am fritig sehr still gsi, so z säge die ruhe nach dem ansturm. Denn die meiste japaner (ca. 38) sind wieder zrug will dete d semesterferie wieder fertig sind und wills no es paar neui europäer gäh hed, sind mier jetzt de fast i de überzahl ;)

das wuchenend hend mier nüd gwaltigs unternoh, mier sind meh oder weniger dihei bliebe, will eigentlich de ganz samstig morge hend mier husi gmacht und de simmer scho gli mal uf de wäg i usgang gmacht. und das isch würklich wieder mal en glanzleistig gsi, was mier det zstand brunge hend. s ziel vo mier, de mirjam, 3 japanische und 1 dütsche kolleg isch s oktoberfäscht vo cairns gsi. am 6i hemmer üs uf d söcke gmacht und nach gschlagnige 2 stund simmer det mal acho. will de ersti bus hed eifach mal 15min verspötig gha (das chund no öpe die vor...) und die linie gaht natürlich ned grad direkt id stadt, sondern macht lieber no 100 umweg wo eh niemert istiegt. und ide stadt hesch natürlich au ned grad en aschluss uf de nächst bus, drum hemmer det nomal en halb stund müesse warte. aber ebe mier sind de doch no bim oktoberfäscht acho (isch bim cannon park gsi) und hend au scho itrit und alles zahlt. de hends aber vo allne welle en ID gseh und wie mier zwei halt sind, hend mier bevor mier gange sind no all üsi chärtli usem portmonai gnoh, will es git ide stadt halt scho so gangs und es wird immer wieder öpe mal eine usgruumet. aber ebe mängisch wärs gschieder mer wär schläuer.... aber mier hend de en super erfahrig gmacht, denn d kollege wo au mitcho sind, hend de gseid sie gönd au ned ine und de simmer all zäme id stadt und hends no füecht fröhlich gha und ja die erst rundi isch de halt zf üsi chape gange :)

ja und hüt am morge hend mier bzw ich de kater a de beach chle usgnüechteret und mal so en richtige aussie burger gässe.

ich habe fertig.

gruess us down under + cya mate

üses zimmer

üsi oktoberfäschttruppe im woohl shed