Dienstag, 19. Januar 2010

Dubai

18.01.10 - 20-01.10


am flughafe in dubai sind mier am morge am halbi sechsi acho. doch scho bim zoll hend mier die erste problem gha, dur d passkontrolle sind mier no problem los cho, doch nachher hend min ganz koffer durwüehlet. s nächste problem hend mier de scho wieder im taxi gha, will d fahrer üses hotel ned kännt hend... er heds de doch no gfunde und mier hend am morge früeh au scho im hotel uf üses zimmer chönne. det hend mier zerst mal no gschlafe und de namitag mit färnsehluege verbracht. nachem znacht sind mier au scho gli wieder go schalfe -> jetlag lässt grüssen.


hüt (19.01) sind mier uf en sightseeing tour. mit me auto und em indische fahrer sind mier und es paar italiener dur d stadt gfahre worde. mier hend die meiste sehenswürdigkeite gseh und au es paar shopping centre wo d verchäufer scho rächt ufdringlich gsi sind. aber im grosse und ganze isches en gueti tour gsi. zrug uf üsem zimmer hend mier wieder chle färnseh gluegt und em mosche prediger über d lutsprecher zueglost.


Sydney (Hotel)

14.01.10 - 17.01.10


eigentlich isch üses hütige (15.01) programm gsi, dass mier am morge früeh ufstöhnd und uf manly gönd go surf unterricht näh. doch wiedermal ineme bequeme, richtige bett z schalfe, isch vill z schön gsi und mier hend wiiter- und usgschlafe. am spötere morge sind mier id stadt gloffe und sind en coiffure go ufsueche für d mirjam, will sie no ihri haar hed welle mache bevor mier hei gönd. mier hend de au eine gfunde und sie hed en termin becho. währeddem d mirjam bim hörlidieb gsi isch, han ich mich mitem fabian trinkler troffe und mier sind zäme und mit es paar andere kollege vo ihm es paar bier go hebe. s znacht hend mier wieder im hotel eigene restaurant gässe und de sind mier wieder im zimmer verduftet und de au gli mal is bett.


a üsem zweitletschte tag in australie (16.01) hend mier no welle d blue mountains go aluege. mier hend nomal öpis welle mache, wo üs sicher guet i erinnerig bliebt, aber ich nimms voreweg, es isch voll is wassergfalle. mier hend welle go horse-riding i de blue mountains mache. also mier sind nach zwei stund fahrt bi dere pferde farm acho und mit sechs andere hend mier üs ufe sattel gschwunge und üs uf die zwei stündig riit tour gmacht. mini cindy isch eher chle en wildi gsi und es bitzeli unruhig, scho bevor mier abgritte sind. doch mit chle tätschle und guet zuerede hani sie chönne zäme -> der pferdeflüsterer ;) doch wo mier ufem weg gsi sind heds afah regne, aber ned nur es bitz sondern es hed abeglährt was es hed möge. was üs aber meh z dänke gmacht hed, isch gsi dass es au afah hed gwittere und mier erst zrug gritte sind, wo s gwitter scho bi üs gsi isch. und mier (all unerfahrini riiter) hend müesse mit üsne güggle bim grösste gwitter zrugriite. und üsi zwei lebändige salamis sind zwei mal so verchlüpft bim tonner, dass die voll panisch abgsecklet sind und mier die irgendwie hend müesse beruhige und bremse. und wills so gregnet hed, sind d weg halbi bächli worde und das hed minere cindy gar ned gfalle und die isch mängisch eifach stah bliebe und hed nömme wiiter welle... mier sind de doch no bi de farm acho, zwar plutschnass aber mier sind froh gsi hend mier wieder bode unter de füess gha. will mier ned die ganz tour hend chönne mache, hättet mier am nächste tag nomal chönne gah, aber da mier ja denn abflüget hend mier halt en teil vom geld zrug becho.

am abig sind mier richtig operahaus gloffe und hend det go znacht ässe. chicken und kangoroo heds gäh und es isch super gsi.


am 17.01 isch wieder richtig heimat gange. doch bevor mier zum flughafe hend chönne, hend mier no es riede programm gha. am morge us-checke, id stadt no es cap für mich go poste und de no uf maly de simi go bsueche. was mier ned dänk hend, dass mier fast dopplet so lang gha hend bi uf manly wills so vill verkehr gha hed. drum heds au nur ganz churz für es hoi und tschau glanget mitem simi, will mier grad wieder hend müesse abdüse zum s autoabgäh. und mier sind punkt zwei bim jucy acho und hends somit uf de letscht drücker grad no gschafft. nachher hend mier es taxi gnoh und sind a flughafe. det hend mier irgendwie üsi ziit no müesse um d ohre schlah, will de flüger erst 21.45 gfloge isch und mier scho öpe am 15.00 det gsi sind. doch mier sind no froh gsi, dass mier so früeh det gsi sind. wo mier nämlich üses gepäck hend welle ufgeh, hend mier erfahre dass d emirates ihri handgepäck bestimmige gänderet hend und jedi person nur eis gepäcksstück à 7kg cha mit is flugzüg neh. drum hend mier üsi koffere chönne umpacke und no es paar sache wegrüehre und denn hends mier nomal probiert. mier hend de zwar immer no z vill kilo gha, aber wills mier rächt reduziert hend und mier s einte gepäck als de mirjam ihri handtäsche ageh hend, hends üs de doch no dureglah. churz vorem nüni, also churz bevor mier hend chönne i-checke, isch üses gate gänderet worde. so sind mier halt dur de ganz flughafe gwanderet und denn hend mier üse riese vogel gseh. de airbus a 380. gigantisch! au inne isches sehr grossrümig und ich ha für einisch keis platzproblem gha mit de bei. au de 14 stündig und 45 minütig flug isch agneh gsi und ohni turbolenze.



cya

Donnerstag, 14. Januar 2010

Sydney (Jucy)

10.01.10 - 14.01.10

Port Stephens - Sydney: zerst hend mier no chle öpis welle gseh vo port stephens, drum hend mier mal im navi "schöne aussichten" igäh und de dem nachegfahre. leider isch bi zwei vo dene drü pünkt wo mier agfahre hend nüd z gseh gsi ussert wald. wie au immer, de einti isch doch no glückt und isch hammer gsi. und de isch doch au die ziit scho fast verfloge und mier hend üs müesse ufe weg mache nach sydney.


Sydney: nach guet zwei stund fahrt sind mier acho. doch leider hend mier no nüd gseh vom operahaus und all dem zügs, will mier üse caravan platz usserhalb sind. mitem auto hät mer guet 40 minute. aber in sydney heds maut strasse und d parkplätz chostet au es vermöge, drum nähmet mier amigs de bus für id stadt. mier hend jedoch nöme so vill gmacht hüt (10.01) und sind früeh mal is bett.


defür isches hüt (11.01) zum erste mal id 4,4 millione stadt gange. munzig, munzig chli chund mer sich vor neb all dene hochhüser. aber es hed ned nur hochhüser, sondern zwüschet all dene wolchechratzer heds au all die alte gebäude. mier hend üs uf d cokegmacht und sind richtig operahaus gloffe. das gebäude isch herrlich und vorallem nachdem mier no 10 minute gloffe sind, hend mier s operahaus ide sicht gha, mit de harbour bridge im hintergrund. sensationell! mier sind natürlich suscht no chle ide grossstadt umegirrt und hend fast nöme üsi bushaltistell gfunde zum zrug zum platz z fahre.


au hüt (12.01) sind mier ned sehr kreativ gsi und mier sind nomal id city go shoppe und umeschlemmere. natürlich hend mier au no öpis interessants gmacht. mier sind nämlich uf de sydney tower (hed zwar je 25 dollar kostet) defür hend mier en usblick gha über all hochüser und die ganzi stadt. de tag isch schnuerstracks verbie gange und am abig hend mier kochet und en dvd gluegt und de isches scho wieder spat gsi.


langsam sind mier scho fast chle sydney-experte, denn au hüt (13.01) isches wieder id stadt gange. jedoch isch hüt ned nur lädele agseid gsi, sondern mier hend no s operahaus und kingscross welle gnäuer go aluge. doch scho früeh uf üsere stadt tour sind mier abgwiche vo üsem plan und mier sind is marine museum. am hafe heds es älters militärschiff gha (en zerstörer) und es u-boot. und i beid hed mer chönne ine go luege, wie die arme soldate ghuset hend. und im u-boot isches also würklich extrem eng und chli alles. nachdem mier die zwei wasserfahrzüg agluget gha hend, sind mier richtig kingscross gwanderet. kingscross isch bekannt für backpacker und schnäbilüpfer schüppe. aber es isch ned würklich speziell gsi, aber mer muesses halt gseh ha. ja und scho wieder isch en tag dure und mier hend gässe und gönd no i mc donalds, will mier det gratis is internet chönd.


nur no 3 täg in australie und mier wend no so einiges go mache. ufem programm stönd no d blue mountains, surfe, packe und no es paar kollege wo au in sydney sind treffe. aber hüt (14.01) sind mier zerst mal bi rege zu greyhound gfahre üse koffer go abhole. denn sind mier ines ichaufszentrum die letschte mitbringsel go poste und denn uf d suechi vo üsem hotel, wo mier die letschte täg in sydney verbringet. es isch ned ganz im chueche, aber z fuess sind mier i guet 20-30 minute bim operahaus. denn sind mier aber no zum jucy da in sydney gstresst, will mier eigentlich de camper morn müesstet abgeh und mier de aber gärn no zwei täg länger würdet bhalte und erst am tag vo de abreis abgeh. und das chönd mier au so mache. nach all dem sind mier im pool schnell en schwumm go näh und nachher im hotel eigne restaurant go s znacht ässe. und jetzt lieget mier im bett und lueget was mier alles wend mache morn.


gruess und ca soon



Mittwoch, 13. Januar 2010

Port Stephens

09.01.10 - 10.01.10
Ballengarra - Port Stephens: am morge hend mier no s zmorge und duschi gnosse bi de familie krienbühl und denn isches wiedermal wiiter gange mit üsem jucy. mier hend ned de schnellsti weg gnoh ufem highway, wo s navi üs vorgschlage hed, sondern mier sind meh ade küste entlang gfahre und hend die wunderschöni ussicht gnosse. defür sind mier de nachher chle im giät usse gsi und z chehre hed sich ned glohnt, drum sind mier wiiter uf dere strass. und promt isch wieder de wegwieser cho "pacific highway" doch 50 meter spöter heds grumplet und tah, will mier (immer no ufem richtige weg) plötzlich ufere unteerete schotterstrass gsi sind. nach es paar kilometer rally fahrt sind mier aber de würklich au mal ufe highway cho.

Port Stephens: isch nüd spziells, aber eigentlich no es schöns städtli. wie immer sind mier en übernachtigsmöglichkeit go sueche, aber au hüt heds ned so vill frie gha. nach dem mier öpe bi drü gsi sind go frage, hend mier de doch no eine gfunde und de gli mal üses znacht kochet. voller vorfreud, dass mier am nächste tag nach sydney gönd, sind mier is bett.

cya

Freitag, 8. Januar 2010

Ballengarra, Brandson Road 673

06.01.10 - 09.01.10

Coffs Harbour - Ballengarra: mier hend mitem werner krienbühl abgmacht, dass mier bi ihm am mittwuch 6. januar verbie chömed. doch ufem weg zu ihm, sind mier zerst nomal chle nördlich gfahre s dörfli red rock go aluege, wo für d uriwohner vo australie en heiligi bedütig hed. es isch chli und härzig det, aber s einzige wos grad mal hed isch en fluss imünder is meer und a dem en riese sand beach und bank. nachher sind mier schnuerstracks richtig ballengarra gfahre. mier hend zwar no churz en stop gmacht in kempsey. die stadt isch bekannt für ihri original australische farmer hüet wo akubra heisset. nach dem mier bim abzwieger telegraph point abem highway gange sind isches wiiter gange richtig bradnson road, wo de nömme teeret gsi isch. mier hend d fram vo mim aghüratete unkel sin brüder, ebe de werner krienbühl und sini frau lilly, fast uf ahieb gfunde.


Ballengarra: mier sind herzlich empfange worde vo de lilly und ihrere schwöster käthi. de werner isch grad no ufem traktor gsi und au no en andere bärneroberländer de hans-kurt isch no uf bsuech cho. zäme hend mier es paar bier trunke und de heds znacht gäh. am nächste tag hend mier und ebe au no de hans-kurt en privat füehrig vo de lilly gha. sie hed üs de küste entlang richtig south west rocks gfahre zu es paar schöne lookouts und me alte gfängnis. bim znacht sind mier wiederum für de nächsti tag für uf es chlises tourli iglade worde und mier hend das natürlich dankend agnoh. mier sind de chle meh is landes innere gfahre und vomene lookout hend mier en wahnsinnige usblick gha über s grüeni und hügeligi land. und so sind mier schlussendlich statt einere planete halt drü nächt lang da bliebe, aber das hed gar nüd usgmacht und mier hend üse ufenthalt und gastfründschaft vom wener und de lilly sehr gnosse.


cya


Coffs Harbour

04.01.10 - 06.01.10

Kingscliff - Coffs Harbour: die guet 300 kilometer langi strecki hend mier i rund 4 stund zrug gleid. bevor mier aber ufd fahrt hend chönne, sind mier no für längeri ziit verhinderet worde. denn de einti vorder pneu hed mier scho länger nömme so gfalle, will er eifach usse drah abgfahre gsi isch und meh me slick gliche hed als me normale strasse reife. de jucy hend mier de pneu au zeigt gha und er hed gmeint mit dem chömmer locker no uf sydney fahre und sie müesseden de nachher uswächsle, falls mier aber möchtet chöntet mier de scho mal me pneu händler go zeige und lah uswechsle (isch keis problem, da mier ja üs voll versicheret hend). das hend mier de au gmacht und sind bi so eim verbie. da die aber ned mit jucy zäme schaffet sind mier zunere andere bude verwiese worde und det hend mier de mal schön gstunet. so en mechaniker isch ums auto gloffe und hed all reife besichtiget und hed de gseid, dass grad mal ei reife guet sig und all andere drü pneu müessed mier lah uswechsle. das hend mier au gmacht und so sind mier guet drü stund verspötet abgfahre und drum halt au erst spöter in coffs harbour acho.


coffs harbour: wills scho um die 6i gsi isch, hend mier üs uf d suechi nachme plätzli zum übernachte gmacht und ich glaube die nacht wird üs guet i erinnerig bliebe. denn mier hend es paar agfahre und all hend nüd meh gha, will d australier halt immer no ihri grosse ferie hend und denn traditionellerwies gönd go campe). mit vill glück oder au pech hend mier no eine gfunde, jedoch hed de nur no es plätzli direkt am highway gha und üse powerpoint (steckdose) isch ganz mit spinnenetz bedeckt gsi, halt eifach ned ganz so suber wie bis anhin. und z nacht hend mier de keis aug zue tah. d trucks hend grad vor üs vo 80 uf 60 km/h müesse abebremse und die sind natürlich au die ganz nacht dure gfahre. so hend mier am morge am drü bis am füfi afah läse will mier ned hend chönne schlafe und denn sind mier vor luter müedigkeit doch nomal für es stündli zwei igschlafe.

am nächste morge hend mier üs gseid, dass mier uf dem platz sicher kei zweiti nacht meh bliebet und sind uf d suechi nachme andere caravanpark. und chle usserhalb vo coffs harbour in uruga hend mier en ruhige und fridliche platz gfunde. mier sind denn nachher wieder chle meh nördlich gfahre und de ufem waterfall way meh is landes innere. mier hend zwei super schöni und massivi wasserfäll gseh. da ei weg guet 160 kilometer gsi sind isch de tag au schnell umegange und mier sind de zrug uf de caravan platz und näb üs heds no grad es anders jungs schwiizer päärli gah und de hend mier mit dene no chle gschnorret.


cheers + cya


Samstag, 2. Januar 2010

Kingscliff

02.01.10 - 04.01.10

Brisbane - Kingscliff: endlich hend mier mal wieder dörfe wiiter reise nach üsem lange ufenthalt in brisbane. mier sind nomal uf surfers paradiese inegfahre und denn de küste, also eigentlich de ganze gold coast entlang. mier hend uf de durchfahrt au miami gseh :) suscht hend mier nöme so vill meh gmacht oder speziells gseh.

Kingscliff: Kingscliff isch meh es dörfli am meer mit me schöne strand, es isch aber eher ruhig (usgnoh d flüger wo immer über em caravan park de laneaflug startet...) und lauft ned so vill.
eigentlich hend mier welle in byron bay übernachte, da aber det alles voll gsi isch hend mier ufs 45 minute wiitere nördliche kingscliff müesse uswieche.
hüt (03.01.10) sind mier s gross globte byron bay go aluege. für mich persönlich isch das nach rockhampton die zweiti enttüschig uf üsere reis gsi. es isch halt mega touristisch und de strand "überloffe". und hüt isch es bitz usserhalb vom stadt zentrum au no grad en märcht gsi in byron bay, es isch meh es hippie treffe gsi wie in kuranda, und de heds au ide stadt no es paar so komischi vögel gha. defür isch de lookout und östlichsti punkt vom australische festland bim lüchtturm in byron bay sensationell gsi. mier sind de nachher no chle wiiter südlich gfahre nach lennox head, isch nur 15min vo byron bay entfernt und de strand isch minere meinig nah einiges schöner und leerer gsi. nachem bsuech det isches wieder zrug nach kingscliff gange, wo mier no schnell sind go ichaufe und denn zrug uf de zeltplatz.

heisse gruess a all mini "blogfans" :) cya